Salyan rayonunun keçmiş icra hakimiyyəti başçısı Tahir Kərimovun oğlu Ümid Abuzərlinin yaratdığı şirkət Rumıniyada böyük yaşayış aktivləri - 40 villadan ibarət kompleks, eləcə də onlarla dupleks mənzili əhatə edən başqa bir layihə əldə edib. Hafta.az bildirir ki, bu barədə Rumıniyanın Profit.ro portal məlumat yayıb.
Qeyd edək ki, Tahir Kərimovun adı 2015-ci ildə Salyanda yerli tədbirdən bir fotoşəkillə sosial mediada geniş şöhrət qazandı: Məmur yerli məktəblilərin əlində tutduğu gül çələngləri arkadasının altında əzəmətli şəkildə keçib.
Oğlu Ümid Abuzərli sonradan soyadını dəyişdirərək babasının adını götürüb. Qardaşı Həmzə Kərimov 2007-ci ildən 2024-cü ilə qədər SOCAR Petroleum SA-nın Rumıniya törəmə şirkətinə rəhbərlik edib. Təyin olunduğu zaman onun cəmi 23 yaşı var idi.
Profit.ro-ya görə, Abuzərli tərəfindən təsis edilən Memaar Capital, əvvəllər iş adamı Georghe Becalinin ailəsinə məxsus olan Pipera şəhərində 40 villadan ibarət yaşayış kompleksini, eləcə də ət emalı şirkəti Agro Ardeal-ın sahibi yerli milyonçu İoan Peikanın qızından ikinci layihəni əldə edib.
Memaar Capital bir neçə ildir ki, Rumıniya bazarında fəaliyyət göstərir. Tikinti şirkəti rəsmi olaraq 2022-ci ildə fərqli bir adla təsis edilib və daha sonra rebrendinq edilib. Bu gün şirkət özünü üç yaşayış kompleksində 86-dan çox evin sahibi kimi təqdim edir və daşınmaz əmlak sektorunda geniş təcrübəyə malikdir.
Pipera layihəsi Harmony Homes adlandırılıb. Hər biri təxminən 134 kvadratmetr olan qırx iki mərtəbəli villadan ibarətdir. Alexander Residence kompleksinin birinci mərhələsi əvvəlki sahibləri tərəfindən 2021-ci ildə tamamlanıb, ikinci mərhələ isə tamamilə Memaar Capital-a verilib.
Son illərdə Kərimovlar Rumıniyada daşınmaz əmlak və kommersiya layihələrində fəal şəkildə iştiraklarını genişləndirirlər. Həmzə Kərimov keçmiş Biznes Naziri İlan Laufer ilə tərəfdaşlıq quraraq Otopenidə ticarət və əyləncə kompleksinin inkişafı üzərində işləyir. Əvvəllər Kərimov ailəsi ilə əlaqəli qurumlar yanacaqdoldurma məntəqələri şəbəkəsindən ofis binalarına və inkişaf layihələrinə qədər tikinti, pərakəndə satış və infrastruktur aktivlərini idarə edirdi. Haqqin.az
